Сустрэча з Альгердам Бахарэвічам і Юляй Цімафеевай
18-га кастрычніка (субота) ў Беларускай клюбоўні ў Празе адбудзецца сустрэча з пісьменнікам Альгердам Бахарэвічам і паэткай, перакладчыцай, рэдактаркай інтэрнэт-часопіса “ПрайдзіСвет” Юляй Цімафеевай.
У праграме: вершы і проза ў аўтарскім выкананні, прэзентацыя новых кніг, у тым ліку зборніка эсэ Альгерда Бахарэвіча “Ніякай літасці Альгерду Б.”, які выйшаў улетку 2014 году, дыскусія пра сучасную беларускую літаратуру і пераклады замежнай літаратуры на беларускую мову.
Пачатак а 17-й гадзіне.
Альгерд Бахарэвіч нарадзіўся ў 1975 годзе ў Менску. Аўтар раманаў “Праклятыя госці сталіцы, “Сарока на шыбеніцы”, “Шабаны. Гісторыя аднаго знікнення”, а таксама некалькіх зборнікаў апавяданняў. Сталы аўтар беларускай службы Радыё Свабода. У “Бібліятэцы Свабоды” выйшлі ягоныя кнігі эсэ “Малая мэдычная энцыкляпэдыя Бахарэвіча”, “Гамбурскі рахунак Бахарэвіча” і “Каляндар Бахарэвіча”. Ягоны апошні праект на Свабодзе – “Цуды і дзівосы Беларусі”. Вядзе штотыднёвую калёнку на сайце грамадзка-культурніцкай кампаніі “Будзьма беларусамі”. Лаўрэат прэміі “Гліняны Вялес”, двойчы другі лаўрэат прэміі Ежы Гедройця, у 2014 годзе - сябра журы прэміі Гедройця. Удзельнік міжнародных фэстываляў і кніжных кірмашоў. З 2007 году жыў у Гамбургу, у 2013 вярнуўся ў Менск.
Юля Цімафеева – перакладчыца, паэтка. Нарадзілася ў 1982 годзе на Брагіншчыне. У 2004 скончыла факультэт ангельскай мовы МДЛУ. Перакладала з ангельскай мовы паэзію Чарлза Букоўскі, Алена Гінзберга, Ўолта Ўітмэна, Мэцью Дзікмана, Стывена Крэйна, Эймі Лоўэл, з партугальскай – Альбэрту Каэйру, з гішпанскай – Актавіё Паса; прозу і эсэістыку з ангельскай – Эдгара По, Ўістана Хью Одэна, Макса Бірбама, Шарлоты Пэркінс Гілман, Дэвіда Герберта Лоўрэнса, Джойс Кэрал Оўтс, Кейт Шапэн і інш. Адна са стваральніц і сябра рады інтэрнэт-часопіса перакладной літаратуры “ПрайдзіСвет” (http://prajdzisvet.org/).
Пераклады прозы і паэзіі розных аўтараў з’яўляліся ў беларускіх літаратурных выданнях “Дзеяслоў”, “pARTizan”, “ARCHE”, “Паміж”, “Літаратурная Беларусь”, “Makeout”, а таксама ў кнігах серыі Саюза беларускіх пісьменнікаў і часопіса “ПрайдзіСвет” “PostSriptum”: “Маска чырвонае смерці” Э. А. По, “Злачынства, сэр!” і “Вусцішны пакой”.
